சில நேரங்களில்

நேர்ந்து விடுகின்றன

இவைகள்

நாமறியாமல் இல்லை

விளைவறியாமல்  

 

கைதவறி கண்ணாடிக் குமிழ்கள்

உடைகின்றன

துடிக்கின்ற மீன்களுக்கு

தூண்டில்கள் இல்லை  

 

புரண்டெழும் போது

புதைகின்றன சில எறும்புகள்

இறுதிக் கூட்டத்தின் ஓலம்

எட்டுவதில்லை நம்மை  

 

வாசனை பிறக்கின்ற வேளைகளில்

மலர்களில் சில மரிக்கின்றன

  

இறகின் மேன்மை

வியக்கப்பட

கிழிக்கப்படுகின்றன வண்ணத்துப்பூச்சிகள்  

 

தெரிந்தா  செய்தேன்

இதெற்கென்ன செய்ய

எப்படியும் கைவசமிருக்கின்றன 

நம்மிடம் சில காரணங்கள்  

 

கவனித்துக் கொண்டேயிருக்கிறது

காரணங்களை நம்மேல் பிரயோகப்படுத்த

காலம் நம்மை .