Tags

 

பெருந்தாகங் கொண்ட

வருணனைக் கொவ்வாத 

விலங்கொன்று

எச்சில் சொட்டச் சொட்ட

எதிர்ப்பட்டிருக்கலாம் தெருமுனையில்

 

பேரழகி ஒருத்தி

மேனியிலே படர

இதழ் சூட்டில் வெந்து

இமை திறக்கும் போது

மார்பின் மேல் அமர்ந்திருப்பவளின்

பற்கள் மட்டும் நீண்டிருக்கலாம்

 

வெகு நேரம் காத்திருந்து

பேருந்தின் ஓய்வு இடைவெளியில்

ஒரு ரூபாய் தேடிச் சலித்து

மீதம் பற்றிய கவலையன்றி

தாளொன்றை வீசியெறிந்து

விரைந்தோடும் கழிப்பறையில்

எதிர்படும் அறைமொத்தமும்

ஆள் உண்டு மூடியிருக்க

கடைசி ஒன்று மட்டும்

கதவின்றிக் காத்திருக்கலாம்

 

கதவு திறந்து அப்பாவே 

விரல் பிடித்துக் கூட்டிச் சென்று

கால்ச் சராய் நீக்கி

‘போ’ என்று சொன்னதாய்

நினைவும் இருக்கலாம்

 

இருக்கவே செய்கின்றது

சொல்லமுடியா

சுவாரசிய காரணங்கள்

தூக்கத்தில் படுக்கை

நனைந்திருத்தலுக்கு …