இத்தனைக்கும் பிறகு 

எவ்வளவு பிடிக்கும் என்று 

நானும் சொல்லவில்லை

அவளும் கேட்கவில்லை

இன்னமும் எழுதுகிறாயா 

எனக் கேட்டாள்

இன்னமும் நீ படிப்பதில்லை 

என்று மீண்டும் 

உறுதி செய்து கொண்டேன்

என்னிடம் எற்கனவே இருக்கும் 

அவளது எண்ணை 

அவள் சொல்லி 

மீண்டும் பதிந்து கொண்டேன்

பாதுகாக்கப்பட்ட அவளது 

முகப்புத்தகக் பிரதேசத்தில்

அனுமதித்துக் கொண்டாள்

கொஞ்ச நாள்

காலை வணக்கம் இனிய இரவு

அனுப்பலாம்

படித்ததில் பிடித்ததைப் 

பகிரமட்டுமே 

அவளது மின் சாளரப்பக்கம் வந்ததாக

பாசாங்கு செய்யலாம்

பதிலுக்கு மரியாதை நிமித்த 

மெய்நிகர் மஞ்சற் புன்னகைகள் 

கிடைக்கப் பெறலாம்

இனி ரகசியமாகப்  

பின் தொடரத் தேவையில்லை

அதைத் தவிர

வேறொன்றும் மாறவில்லை.

***